Nondik?

Abuztuaren 9a. Aspalditik markatuta neukan data agendan, eta inoiz ez zela iritsiko uste nuen. Orain berriz, atzo izan zela iruditzen zait, bi hilabete pasa diren arren.

Egun horretan irten nintzen Euskal Herritik, euskaldunen presentzia handia duen herrira, Uruguaira. Egia esan, aurreko egunetan ere, hemen gehiago nuen burua hor baino: maleta, hegaldia, hizkuntza... Beldurra ere sentitzen nuen, herrialde txiki hau handiegi geratuko ote zitzaidan, zergatik ukatu!

Sentsazio horiekin hartu nuen Euskal Herrikoen aldean “zaharra” zirudien autobus hura aireportuan. Montevideora iritsi, eta Euskal Herrian baino jende irekiagoak lagundu zigun hostalera iristen. Eta zer esan lehenengo egunei buruz! Hiria lasaia iruditu zitzaidan, baina gauza batzuk harrigarriak egiten zitzaizkidan, esaterako, gurdia zeramaten zaldiekin hondakinak biltzen dituen jendea ikustea. Hondakinak biltzeko sistemari buruzko eztabaidan bizi den gipuzkoar batentzat ulertezina zen! Eta horrela, beste milaka adibide...

Pixkanaka, ohartu naiz Hego Amerikan nagoela, Uruguain, Montevideon, eta ez Euskal Herrian. Beraz, Euskal Herriko betaurrekoak erantzi, eta hemengo ikuspegitik osatu nahiko nuke nire eguneroko hau. Hemendik eta zuentzat, zuek ere herrialde honetako borroken berri izan dezazuen.

On egin!